موضوع: قصه اختفاء 17 يوم تحت التراب اختفاء جيسيكا وهولي؟! 2023-04-06, 23:24
قصه اختفاء 17 يوم تحت التراب اختفاء جيسيكا وهولي؟!
فقصتنا اليوم بتتكلم عن صديقتين جيسكا وهولي ، عمرهم 10 سنين، بيعيشوا في شارع واحد اسمه (سوهام)، في (انجلترا).وكمان بنفس المدرسة ونفس الصف، يعني باختصار بيست فريند.
وبسبب صداقة جيسكا وهولي المقربة جدا خلت حتي الأسر يبقوا أصدقاء،
يعني عيلة جيسكا بقوا أصدقاء لعائلة هولي، وبقت الأسرتين يزوروا بعض كتير، وف يوم من الأيام زارت عيلة جيسكا عيلة هولي تحديدا يوم الأحد 4-8-2002 كانت الأسرتين مستمتعين جدا بالوقت، فجيسكا وهولي قالوا لأهلهم أنهم راحين للسوبر ماركت، والسوبرماركت دا كان قريب جدا من البيت، يعني المفروض العيلتين مايخافوش، وطلعوا من البيت وراحوا عالسوبر ماركت تقريبا الساعة 6 وربع بالليل، وبعد ما طلعوا اتأخروا كتير، فقلقت العيلتين بالذات ان السوبرماركت قريب منهم، فاضطر أبو جيسكا وأبو هولي ينزلوا ويدوروا علي البنتين، ودوروا كتير لحد الساعة 10 بالليل والبنتين لسه مرجعوش، يعني تقريبا 3 ساعات الا ربع والبنتين لسه مرجعوش، ومن خوف العيلتين علي البنتين اتصلوا علي الشرطة،
وحكوا للشرطة كل اللي حصل، فالشرطة بدأت تحقق في الموضوع وبدأوا ينشروا أخر صورة للبنتين، وكانت الصورة قبل مايروحو للسوبرماركت، وكانو واقفين جمب بعض ولابسين بلوزة مانشستر يونايتد.
وكمان الشرطة اهتمت بأنهم يسألوا الجيران، لأن ممكن حد من الجيران شافهم او شاف حد خطفهم، وفعلا بدأو يسألوا الجيران ووصلتهم لنتيجة مهمة جدا، وهي ان أخر واحد شاف البنتين كان اسمه ايان.
وايان دا كان شغال حارس في مدرسة جيسكا وهولي، وعنده صديقة اسمها ماكسين.
وماكسين كانت بتشتغل مُدرسة بنفس المدرسة، وماكسين كانت بترطها علاقة قوية بجيسكا وهولي. ايان بيقول انه اخر مرة شاف فيها البنتين كانوا معديين من أدامه وهو بيغسل للكلب بتاعه، وقال انه ندمان جدا عشان مسألهمشي رايحيين فين. وماكسين قالت انها كانت موجودة جوه بيت ايان، ومخدتشي بالها ان كان البنتين عدوا ولا لأ.
وكانت الصحافة والاعلام مهتمين جدا بالموضوع ده، لدرجة انهم عملوا لقاءات كثيرة مع العيلتين، وف احدي الحلقات طلع ايان وتكلم وقال، انا معرفش البنتين شخصيا بس اتمني انهم يرجعوا لأهلهم، أما ماكسين قالت عن هولي انها كانت فتاه لطيفة، المذيع اللي كان عامل اللقاء مع ماكسين استغرب ليه هي بتتكلم بصيغة الماضي؟؟! كإن البنت ماتت، البنتين مختفيين مش مقتولين، فكلام ماكسين بصيغة الماضي خلت المذيع يستغرب ويشك فيها، فاضطر انه يبلغ الشرطة، وكان ايان خارج دايرة المشتبهين.
وفي يوم من الأيام اتصلت امرأة بالشرطة وقالت انها اتعرفت علي ايان عالتلفيزيون، من خلال احدي لقائاته وقالت ان ايان تم اتهامه قبل كده في قضية اغتصاب طفلة بس متحاكمش.
فبسرعة الشرطة دورت علي ملف ايان ولقوا انه كان متهم 4 مرات بممارسة الجنس مع القاصرات، و3 مرات محاولات اغتصاب ومتحاكمشي في ولا قضية!!
فاستدعت الشرطة ايان وماكسين، عشان يحققوا معاهم وخلال التحقيق كانت الشرطة بتفتش بيت ايان وماكسين وبعد ماخلصوا تفتيش، راحو للمدرسة اللي كان شغال فيها ايان وراحو للغرفة اللي بيقعد فيها والنتائج اللي حصلت عليها الشرطة كالأتي: لقوا بلوزتين البنتين محترقين ومرميين في سلة الزبالة، وكانت السلة تحمل بصمات ايان، وكان دا دليل كافي علي ان ايان هو اللي مسؤول عن اختفائهم.
ودي مكنتشي المفاجأة الأولي، بعد م قبضو عليهم، طلبت ماكسين منهم بانها تعمل مكالمة تليفون من مركز الشرطة، وكانت المكالمة دي متراقبة، وأثناء المكالمة قالت ماكسين لأم ايان، بان ابنها قال لها انه خد البنتين جوه بيته يوم الاختطاف، وانها مكنتش موجودة في بيت ايان يوم الحادث، هي قالت كدا للشرطة عشان بس تبعد الشبهة عن أيان.
وقبل ماتوجه الشرطة التهمه لأيان وماكسين، في واحد شغال حارس لمنطقة فيها حيوانات اتصل عليهم، وقال لهم انه لقي جثتين محترقتين لأنه كان بيشم ريحة كريهه فراح ودور علي مصدر الريحة دي منين فلقاها ريحة الجثتين المحترقتين، اتأكدت الشرطة بعد فحص الجثتين انها بتخص الطفلتين جيسكا وهولي، بس للأسف الطب الشرعي مقدرشي يتعرف علي سبب الوفاة، بسبب حرق الجثتين، وكان واضح للشرطة ان سبب حرق الجثتين مقصود، عشان يخفوا الأدلة أو البصمات عن الطب الشرعي.
في اليوم التاني وجهت الشرطة تهمة القتل رسميا لأيان، وتوجيه تهمتين "تضليل العدالة والتستر علي المجرم" لصديقته ماكسين وبعدين حولوهم للمحكمة.
في المحكمة ايان قال انا شفت هولي بتنزف من انفها، فطلبت مني المساعدة ودا اللي خلاني اخد هولي وجيسكا للحمام، عشان اساعدها في وقف النزيف بس بالغلط خبطتها علي راسها فأغمي عليها ووقعت في حوض الاستحمام،
وقال ان جيسكا بعد ماشافت هولي مغمي عليها قعدت تصرخ، وبمحاولة مني عشان اسكتها قتلتها بالغلط بسبب اني خنقتها، ويقول ماتت هولي بسبب الغرق عشان حوض الاستحمام كان مليان مايه.
طبعا دا كلام مش حقيقي، لإن لو كان حقيقي اكيد المحكمة كانت هتبرأه من التهمه، لانه قتلهم من غيرمايقصد، وطبعا انت كقارئ الوقتي اكيد مستحيل هتصدقه، وبالفعل دا اللي حصل شخص واحد بس من 12 شخص هو اللي صدق الكلام، و11 شخص مش مصدقين كلامه، لأن كلامه مش معقول، وهنا تم الحكم علي ايان بالقتل عمدا، وحكموا عليه بالسجن مدي الحياة.
أما ماكسين وجهوا لها تهمة تضليل العدالة، ومتحاكمتش بتهمة التستر علي المجرم، لأنها قدرت تقنع المحكمة بإنها كذبت لأنها متعرفش ان هو قاتل، بس قالت انها كانت في بيت ايان عشان تبرئه بس من التهمه، ومتعرفشي ايه اللي حصل للبنتين في اليوم ده، وحكموا عليها بالسجن لمدة 3 سنين ونص.
وخدت نص الحكم وطلعت، واما طلعت غيرت اسمها وهويتها وكل حاجة كانت متعلقة بها، عشان محدش يتعرض لها .
والسؤال موجه لك انت الأن صديقي، ايه رأيك في القضية، ي تري الحكمين دول كانوا كافيين عليهم؟ ولا انت عندك رأي ثاني؟
قصه اختفاء 17 يوم تحت التراب اختفاء جيسيكا وهولي؟!
قصه اختفاء 17 يوم تحت التراب اختفاء جيسيكا وهولي؟! 
مــوضوع
أستعرض الموضوع السابق 
